1 
0 
ચાલુ સત્ર દરમિયાન ‘એન્ટી પેપર લીક બિલ’ને લઈને લોકસભામાં સતત બીજા દિવસે પણ જોરદાર ચર્ચા અને રાજકીય ઘર્ષણ જોવા મળ્યું. વિપક્ષી સાંસદોના ભારે હોબાળા અને સરકાર-વિપક્ષ વચ્ચેના તીખા વાકયુદ્ધ વચ્ચે આખરે આ મહત્ત્વપૂર્ણ વિધેયક ધ્વનિમતથી પસાર કરવામાં આવ્યું. બિલ પસાર થયા બાદ લોકસભાની કાર્યવાહી કાલ સુધી માટે મુલતવી રાખવામાં આવી.ચર્ચા દરમિયાન વિપક્ષના નેતા રાહુલ ગાંધીએ દેશની શિક્ષણ વ્યવસ્થા, પરીક્ષા પ્રણાલી અને સરકારની કામગીરી અંગે આકરા સવાલો ઉઠાવ્યા હતા. તેમણે અનેક સ્પર્ધાત્મક પરીક્ષાઓમાં થયેલા પેપર લીકના બનાવોને ટાંકીને સરકાર પર યુવાનોના ભવિષ્ય સાથે બેદરકારી દાખવવાનો આરોપ મૂક્યો હતો. સાથે જ તેમણે ગૃહમંત્રી પર પણ નિશાન સાધતાં સરકારની જવાબદારી અંગે પ્રશ્નો ઉઠાવ્યા હતા.
રાહુલ ગાંધીના આક્ષેપોનો જવાબ આપતાં પીએમઓમાં રાજ્યમંત્રી ડૉ. જિતેન્દ્ર સિંહે જણાવ્યું કે વિપક્ષ દ્વારા કરવામાં આવેલા આક્ષેપો તથ્યવિહોણા અને બિનજવાબદાર છે. તેમણે કહ્યું કે કેન્દ્ર સરકાર પરીક્ષા પ્રણાલીને વધુ પારદર્શક અને વિશ્વસનીય બનાવવા પ્રતિબદ્ધ છે અને ‘એન્ટી પેપર લીક બિલ’ એ જ દિશામાં એક મહત્વપૂર્ણ પગલું છે. સત્તાપક્ષના અન્ય સભ્યોએ પણ વિપક્ષના આક્ષેપોને રાજકીય પ્રેરિત ગણાવી સરકારનો બચાવ કર્યો હતો.ચર્ચા દરમિયાન બંને પક્ષો વચ્ચે અનેક વખત ઉગ્ર બોલાચાલી થઈ હતી, જેના કારણે ગૃહમાં ભારે હોબાળો મચ્યો હતો. અધ્યક્ષે અનેક વખત સભ્યોને શાંતિ જાળવવા અપીલ કરી હતી, છતાં હોબાળો ચાલુ રહ્યો. અંતે તમામ પ્રક્રિયા પૂર્ણ કર્યા બાદ બિલ ધ્વનિમતથી પસાર કરવામાં આવ્યું.સરકારનું કહેવું છે કે આ કાયદા દ્વારા જાહેર પરીક્ષાઓમાં પેપર લીક, ગેરરીતિઓ અને પરીક્ષા માફિયાઓ સામે કડક કાર્યવાહી માટે કાનૂની માળખું વધુ મજબૂત બનશે, જ્યારે વિપક્ષનું માનવું છે કે માત્ર કાયદો લાવવાથી સમસ્યાનો ઉકેલ નહીં આવે, પરંતુ તેની અસરકારક અમલવારી પણ એટલી જ જરૂરી છે.બિલ પસાર થયા બાદ લોકસભાની કાર્યવાહી કાલ સુધી માટે મુલતવી રાખવામાં આવી હતી.
About the Author
